Trak tumagilid sa entry ramp ng NLEX, drayber sugatan

Sugatan ang isang driver matapos tumagilid ang minamanehong 18 wheeler truck Biyernes ng umaga, Abril 24.
Sa ulat, nangyari ang insidente sa entry ramp ng NLEX paglabas ng Mel Lopez Boulevard sa Maynila.
Nabatid na galing ng pier ang truck at humango ng container van at idedeliver sana nila ito sa Nueva Ecija nang mangyari ang insidente.
Nabasag ang windshield ng truck dahilan para masugatan ng mga bubog ang driver na dinala sa ospital sa Valenzuela habang hindi naman nagtamo ng pinsala ang pahinante.
Nagkaroon naman ng bahagyang pagtagas ng langis ngunit agad ding nalinis para makaiwas sa mas malalang panganib sa kalsada sa mga dumaraang mga sasakyan.