Pinas, binigyan ng ‘negative’ outlook ng Fitch Ratings

Ibinaba ng Fitch Ratings ang credit outlook ng Pilipinas mula “stable” patungong “negative” dahil sa mga panganib mula sa global energy shock at pagkaantala sa public investment na maaaring makaapekto sa post-pandemic recovery ng bansa.
Nanatili naman sa “BBB” o investment grade ang Long-Term Foreign-Currency Issuer Default Rating ng Pilipinas, ngunit nagbabala ang ahensya sa lumalalang hamon tulad ng mataas na presyo ng enerhiya, tumataas na utang ng gobyerno, at unti-unting paghina ng external finances.
Ayon sa Fitch, “rising risks to the Philippines’ strong medium-term growth prospects from recent disruptions to public investment, exacerbated in the near-term by elevated exposure to the ongoing global energy shock.”
Sa kabila nito, tinaya ng Fitch na aabot sa 4.6% ang GDP growth ng Pilipinas sa 2026, kung saan inaasahan ang unti-unting pagbangon ng public investment ngunit maaapektuhan ang konsumo ng mataas na presyo ng enerhiya.
Ayon sa Bangko Sentral ng Pilipinas, nananatiling matatag ang ekonomiya dahil sa malakas na paglago at maayos na lagay ng banking system.
Sinabi ni BSP Governor Eli Remolona Jr. na patuloy na mino-monitor ng bangko sentral ang epekto ng oil prices at geopolitical tensions, partikular sa Middle East, at handang kumilos laban sa inflation sa “measured, timely, and data-driven manner.”
Binanggit din ng Fitch ang mga hakbang ng gobyerno tulad ng National Energy Emergency at sinabi na sapat pa rin ang foreign exchange reserves na nasa $106.6 billion.
Nilinaw ng ahensya na ang “negative outlook” ay hindi automatic na downgrade, ngunit indikasyon ng mas mataas na panganib sa susunod na isa hanggang dalawang taon.