P13.3M marijuana kush nasabat sa pasahero sa NAIA

Nasabat ng Bureau of Customs (BOC) ang tinatayang P13.3 milyong halaga ng hinihinalang marijuana kush mula sa isang pasahero sa Ninoy Aquino International Airport (NAIA) Terminal 1 noong Huwebes, Hunyo 4.
Ayon sa BOC-NAIA, na-detect sa x-ray scan ng check-in baggage ng isang Pilipinong pasahero mula sa Thailand ang kahina-hinalang laman, dahilan upang isailalim ito sa masusing inspeksyon.
Sa isinagawang pisikal na pagsusuri, natuklasan ang 21 medium-sized packs, 42 small packs, at dalawang medium-sized containers na naglalaman ng pinatuyong dahon na hinihinalang marijuana kush.
Tinatayang aabot sa 8,910 gramo ang kabuuang bigat ng mga nasamsam, na nagkakahalaga ng P13,365,000.
Agad na nakipag-ugnayan ang BOC sa Philippine Drug Enforcement Agency (PDEA), na nagsagawa ng K9 sniffing operation na nagpakita ng positibong indikasyon sa ilegal na droga.
Itinurn-over na ang mga nakumpiskang droga sa PDEA para sa laboratory examination, karagdagang pagsusuri, at case build-up.