Gazini Ganados nagtapos sa Top 5 sa Miss Grand International All Stars

Nagtapos sa Top 5 ang laban ni Gazini Ganados sa Miss Grand International All Stars matapos ang coronation night nitong Sabado, Mayo 31, sa Bangkok, Thailand.
Si Gazini ang huling Pilipina na natira sa kompetisyon matapos maunang malaglag sina Fuschia Anne Ravena, Alexia Nuñez, Imelda Schweighart, at Keylyn Trajano.
Nagningning ang beauty queen swimsuit at evening gown rounds, lalo na sa suot niyang golden gown na likha ng Filipino designer na si Rian Fernandez. Tampok sa kasuotan ang disenyo na sumasalamin sa kanyang dugong Pilipino at Palestinian.
Sa question-and-answer portion para sa Top 5, tinanong si Gazini tungkol sa mga konkretong hakbang laban sa cyberbullying.
“I was once a victim of cyberbullying. It is not easy to go through something that you didn’t ask for. As a Filipina-Palestinian, I have raised my voice and I have conquered through my fears because I faced the struggles that I’ve been facing,” sabi ni Gazini.
“My family is still stuck in Gaza and now that I’m fighting for their lives, I just want to do my best and be their representation and raise their flags just like who I am today as a Filipina-Palestinian,” dagdag pa niya.
Matatandaang naging kinatawan din ng Pilipinas si Gazini sa Miss Universe 2019 kung saan nagtapos siya sa Top 20.
Samantala, si Vanessa Pulgarin ng Colombia ang kinoronahan sa kauna-unahang Miss Grand International All Stars.