Iran oil tankers umatras sa US blockade; trapiko sa Hormuz, lumalala

 Anim na tanker na may kargang Iranian oil ang pinabalik sa Iran nitong mga nakaraang araw dahil sa US blockade, ayon sa ship-tracking data, na nagpapakita ng matinding pagkaantala sa daloy ng barko sa Strait of Hormuz, isa sa pinakamahalagang oil route sa mundo.
Bago ang US-Israeli war sa Iran noong Pebrero 28, nasa 125 hanggang 140 barko ang dumaraan sa naturang strait araw-araw. Sa nakalipas na araw, pito na lamang ang nakadaan at wala sa mga ito ang may dalang oil para sa global market, ayon sa Kpler at SynMax data.
Ang Strait of Hormuz ay dumadaan ang humigit-kumulang 20% ng pandaigdigang suplay ng langis at liquefied natural gas.
Noong Abril 13, nag-anunsyo ang US ng blockade laban sa Iran-related shipping, habang 37 barko na ang na-turn back ng US forces, ayon sa military data noong Abril 25. Nagpatupad din ng sariling restrictions ang Iran sa lugar.
Ayon sa ship broker Clarksons, parehong bansa ang nakaaapekto sa daloy ng maritime traffic—may mga barkong hinaharang ng Iran at mayroon ding pinipigilan ng US.
Tinatayang 10.5 milyong bariles ng langis ang laman ng anim na tanker na pinabalik sa Iran, ayon sa TankerTrackers.com. Gayunman, may ilang barko pa ring nakalusot, kabilang ang dalawang tanker na umabot sa Asia na may dalang humigit-kumulang apat na milyong bariles.
Ayon sa mga analyst, maaaring umabot hanggang Malacca Strait ang interception ng US, kaya hindi pa rin tiyak kung makararating ang ilang kargamento sa mga buyer.
Tinatayang daan-daang barko at nasa 20,000 seafarers ang nai-stranded sa Gulf, at nagbabala ang International Maritime Organization na lumalaki ang panganib ng aksidente at environmental disaster kung magpapatuloy ang sitwasyon.