4 drug den operatos timbog sa Maguindanao del Norte

Arestado ang apat na operator ng drug den, kabilang ang isang babae, sa isang entrapment operation ng pinagsanib na puwersa ng mga anti-narcotics agent at sundalo sa Barangay Baka, Datu Odin Sinsuat, Maguindanao del Norte noong Linggo, Agosto 23.
Sinabi nitong Martes ng mga lokal na opisyal at mga opisyal ng intelligence units ng Army’s 6th Infantry Division na ang apat na suspek, na ngayon ay nakakulong, ay nagbebenta rin ng marijuana na ibinibigay sa kanila ng ilang natitirang miyembro ng nalansag nang Dawlah Islamiya terror group.
Ayon kay Edgar Jubay, regional director ng PDEA-BARMM, sinuportahan ng iba’t ibang yunit ng Police Regional Office-Bangsamoro Autonomous Region at mga tauhan ng Army’s 1st Mechanized Battalion ang entrapment operation na humantong sa pagkakaaresto sa apat na suspek. Ang naturang batalyon ay nasa ilalim ng operational control ng 6th ID.
Sinabi ni Jubay na isinagawa ang operasyon batay sa mga ulat mula sa mga kamag-anak at kapitbahay ng apat na suspek tungkol sa kanilang ilegal na mga aktibidad.
Agad na inaresto ng mga operatiba ang apat na suspek matapos silang bentahan ng shabu sa mismong loob ng kanilang drug den, kung saan nagsasagawa rin sila ng mga pot session para sa mga bumibili ng kanilang ilegal na paninda, ayon kay Jubay.
Nasamsam mula sa mga suspek ang shabu na nagkakahalaga ng P146,200, isang .45 caliber na baril, mga drug-sniffing paraphernalia at mga cellphone na naglalaman ng mga numero ng kanilang mga kasabwat sa iba’t ibang barangay sa Datu Odin Sinsuat at Cotabato City.
Sinabi ni Jubay na kakasuhan ang apat na suspek ng paglabag sa Comprehensive Dangerous Drugs Act of 2002, gamit bilang ebidensiya ang shabu na nakumpiska mula sa kanila.
Sa ilalim ng batas ng estado, ang pagpapatakbo ng drug den ay isang krimeng hindi maaaring piyansahan.