2 ‘missing’ na mangingisda biktima ng maritime hijacking

Naglabas ng babala ang mga awtoridad nang matagpuan ang isang abandonadong bangka na palutang-lutang sa karagatan malapit sa Lantawan, habang patuloy na hinahanap ang dalawang nawawalang mangingisda na pinaniniwalaang biktima ng maritime hijacking.
Kinilala ang mga nawawala na sina Sattih Masala Baradjih at Darwin Muhajiran Abdulgapar, na umano’y bumiyahe mula Panducan Island patungong Isabela City.
Batay sa paunang impormasyon mula sa kanilang pamilya, pinaniniwalaang hinarang ang kanilang sinasakyang pump boat ng isa pang bangka na sinasabing may sakay na armadong kalalakihan.
Pinaghihinalaang kinuha ang kanilang kargamento bago tuluyang nawala ang dalawa.
Sa kasalukuyan, nagpapatuloy ang search and rescue operations ng mga otoridad, katuwang ang mahigpit na pagbabantay sa mga coastal barangay sa Basilan upang maiwasan ang posibleng karagdagang insidente.
Patuloy pa ang imbestigasyon upang matukoy ang tunay na nangyari at ang pagkakakilanlan ng mga suspek.