MATAPOS ang isang taong pamamahinga sa amateur bout, balik upak ang panganay na anak ng nag-iisang eight division world champion Manny “Pacman” Pacquiao na si Emmanuel “Jimuel” Pacquiao, Jr. sa ‘Spring Rumble’ Amateur Boxing sa Abril 19 sa Radiant Brand Complex sa Las Vegas, Nevada sa Amerika.
Inihayag ng Viva Promotions ang naturang sunod na laban ng 23-anyos na kasalukuyang naninirahan sa Glendale, California na masusing ginagabayan nina trainer Marvin Somodo at Hall of Famer coach Freddie Roach sa pamosong Wild Card Gym sa Los Angeles, California.
Wala pang pangalang inihahayag sa makakatapat ng orthodox boxer na nag-aral sa Brent International School para sa kanyang ika-siyam na sabak sa amateur fight, na paunti-unting inihahanda para sa kanyang professional debut sa takdang panahon.
“Manny Jr. is just training every day just like my other professional fighters,” pahayag ni Somodio sa naunang panayam ng World Boxing News.
“Turning pro in the future is the plan for him, and once I see that he is ready. The plan is for him to become a professional boxer, but you never know.”
