Isinusulong ng Pilipinas ang mas inklusibo at responsableng paggamit ng artificial intelligence (AI) sa Southeast Asia kasabay ng paglahok nito sa Asia Tech x Singapore (ATxSG) Summit 2026.
Sa pangunguna ng Department of Information and Communications Technology (DICT), binigyang-diin ng bansa ang kahalagahan ng pagtugon sa mga hamon sa digital infrastructure, digital skills, at access sa teknolohiya upang mas maraming mamamayan at negosyo ang makinabang sa digital economy.
Ayon sa DICT, layunin ng Pilipinas na matiyak na ang pag-unlad ng AI ay makatutulong hindi lamang sa pamahalaan kundi maging sa mga manggagawa, komunidad, at micro, small, and medium enterprises (MSME).
Sa isinagawang summit noong Mayo 19-20, nakipagpulong ang mga opisyal ng Pilipinas sa mga kinatawan ng Singapore, United States, at mga lider ng industriya upang talakayin ang AI governance, cybersecurity, digital infrastructure, at workforce development.
Tinalakay rin ang mga posibleng kooperasyon sa larangan ng cybersecurity, data centers, subsea cable projects, at iba pang digital connectivity initiatives.
Binigyang-diin ng Pilipinas na ang pambansang AI strategy nito ay nakasentro sa tiwala, pagiging handa, at inklusibong pag-unlad upang matiyak na ang teknolohiya ay magreresulta sa mas mahusay na serbisyo publiko, ligtas na digital transactions, at mas maraming oportunidad sa trabaho.
Ipinakita rin ng bansa ang lokal na inobasyon sa pamamagitan ng Team CATS mula sa University of Santo Tomas, na nagpresenta ng “NutriGuide”, isang AI-powered project na tumutulong sa pagtugon sa child malnutrition sa pamamagitan ng nutrition screening at health recommendations.
Kasabay ng pagiging ASEAN Chair ng Pilipinas ngayong 2026, patuloy nitong isinusulong ang isang regional digital agenda na nakatuon sa tiwala, inclusivity, at mas malawak na oportunidad para sa mga mamamayan ng Southeast Asia, ayon pa sa DICT.
Related Posts
