Nabisto ng mga awtoridad ang umano’y online sex for sale operation sa Laguna nang iulat ng isang miyembro ng Laguna Youth Patrollers ang isang Facebook page na ginagamit umano sa pag-aalok ng kababaihan kapalit ng pera at pagtarget sa mga menor de edad.
Ayon sa paunang imbestigasyon, isang 16 taong gulang na babae ang natukoy na posibleng biktima sa naturang ilegal na operasyon.
Agad namang iniutos ni Laguna Governor Sol Aragones ang masusing imbestigasyon upang matukoy at mapanagot ang mga nasa likod ng online operation.
Nagsagawa na rin ng hiwalay na imbestigasyon ang Laguna Police Provincial Office sa tulong ng Cybercrime Unit upang matukoy ang mga suspek at ang posibleng paglabag sa mga umiiral na batas, kabilang ang online sexual exploitation at human trafficking.
Patuloy ring hinihikayat ng pulisya ang publiko na maging mapagmatyag at agad na iulat ang anumang kahina-hinalang online activities na maaaring may kaugnayan sa pang-aabuso at pagsasamantala sa kababaihan at mga bata.
Related Posts
