Nanawagan ang pamahalaan ng mas mahigpit na obligasyon para sa mga social media platform at messaging services upang maiwasan ang online sexual abuse at exploitation ng mga bata.
Ayon kay Barbara Mae Flores, OIC executive director ng National Coordinating Center laban sa Anti-Online Sexual Abuse or Exploitation of Children (OSAEC) Program at Anti-Child Sexual Abuse or Exploitation Materials (CSAEM) Program, hindi lamang gobyerno o users ang dapat managot kundi pati ang mga tech companies.
“Hindi puwede yung burden ay nasa gobyerno lang o nasa user lang. Kung ang kanilang platforms ay ginagamit para mag-abuso… dapat may kaakibat din silang obligasyon o duty na mag-detect, mag-preserve ng ebidensya, at mag-report, at mag-take down,” ani Flores.
Ipinunto rin niya na dapat may tungkulin ang mga financial institutions na bantayan ang transaksyon na may kinalaman sa ganitong uri ng krimen, dahil kadalasan ay may kaugnayan ito sa pera.
Binigyang-diin din ang “unified referral pathway” kung saan malinaw kung saan maaaring mag-report ang publiko, at pinalalakas din ang cross-border information sharing upang mapabilis ang imbestigasyon sa mga kaso.
Ayon sa UNICEF, tinatayang 2 milyong bata sa Pilipinas ang naging biktima ng online sexual abuse at exploitation noong 2021, kaya patuloy ang panawagan para sa mas mahigpit na proteksyon sa mga bata online.
Related Posts
