Natagpuang patay ang 21-anyos na estudyante sa mababaw na bahagi ng ilog sa Barangay Matengen, Sultan Kudarat, Maguindanao del Norte, nang unang iulat na nawawala sa Cotabato City.
Kinilala ang biktima na si Abubakar Lauban Hasim, third-year Business Administration student ng Cotabato State University.
Iniulat siyang nawawala ng kanyang mga kaibigan at kaklase noong Lunes, Agosto 10.
Kinabukasan, Agosto 11, natagpuan ang kanyang katawan sa tabing-ilog sa Barangay Matengen, may tinatayang 15 kilometro mula sa Cotabato City.
Ayon sa mga kaibigan at kaklase, dati nang nagpahayag ng pangamba si Hasim para sa kanyang kaligtasan matapos umano siyang paulit-ulit na ma-bully ng ilang kalalakihan.
Sinabi rin umano niya sa kanyang mga kaibigan, guro at mga kamag-anak ang pagkakakilanlan ng mga taong sinasabing nang-bully sa kanya.
Batay sa paunang pagsusuri ng mga pulis at barangay officials, may dalawang tama ng bala sa katawan ng biktima.
Hinala ng mga imbestigador na maaaring dinukot si Hasim sa Cotabato City, pinatay, at saka dinala sa Barangay Matengen upang itapon ang kanyang katawan.
Si Hasim ay mula sa isang pamilyang Moro sa Barangay Tukanalipao, Mamasapano, Maguindanao del Sur.
Samantala, sinabi ni Captain Steffie Salanguit, tagapagsalita ng Police Regional Office–Bangsamoro Autonomous Region, na nagtutulungan ang iba’t ibang police units, intelligence operatives at mga lokal na opisyal upang matukoy ang mga nasa likod ng insidente at mabigyan ng hustisya ang pagkamatay ng estudyante.
Patuloy ang imbestigasyon sa posibleng motibo at pagkakakilanlan ng mga suspek.
======
Related Posts
