Maaaring ituring na labag sa Konstitusyon ang pag-realign sa iba pang prayoridad ng gobyerno ng pondong hindi nagamit ng Commission on Elections (Comelec) sa harap ng posibleng pagpapaliban ng Barangay at Sangguniang Kabataan Elections (BSKE).
Ito ayon kay Comelec Chairman George Garcia, habang isinusulong ng ilang mambabatas ang pagpapaliban ng BSKE at ang muling pag-realign ng mga hindi nagamit na pondo nito para sa pagtugon ng gobyerno sa krisis sa enerhiya.
Ayon kay Garcia, maaaring ipagpaliban ang election dahil iyan, aniya, ay kapangyarihan ng mga mambabatas, subalit kung gagamitin sa ibang bagay ang pondong naka-allocation sa election ay hindi puwede dahil ipinagbabawal ito ng Saligang Batas.
Humigit-kumulang P16 bilyon ang natitira mula sa P19 bilyong BSKE budget ng Comelec na may humigit-kumulang P3 bilyon na nagastos na sa paghahanda.
Nagpahayag si Garcia ng pagkabahala sa mga panukala na binanggit ang mga limitasyon ng Konstitusyon sa muling pag-align ng pondo.
Ayon pa kay Garcia, dapat mapag-isipan ang legalidad dahil maaaring iyan din ang makitang dahilan ng Korte Suprema para mabalewala ang magandang plano o inisyatiba na ipagpaliban ang BSKE.
Sinang-ayunan naman ni Senator Ping Lacson ang pahayag ni Garcia na labag sa Konstitusyon ang pag-realign sa pondo ng Comelec, ngunit binanggit na maaaring ideklara ng Comelec ang mga hindi nagamit na pondo bilang savings at ibalik ito sa National Treasury.
“Tama iyan. Kung hindi nagamit ang pondo, maaaring ituring na savings at ibalik sa National Treasury,” ayon naman kay Garcia.
Ang BSKE na orihinal na itinakda sa Disyembre 1, 2025 ay inilipat sa Nobyembre 2, 2026 kasunod ng mga termino ng lahat ng opisyal ng barangay at SK sa apat na taon.
Related Posts
