Higit 36 toneladang basura nahakot matapos ang INC rally

Mahigit 36 toneladang basura ang nahakot sa kahabaan ng EDSA-White Plains Avenue sa Quezon City matapos ang dalawang araw na rally ng mga miyembro ng Iglesia ni Cristo (INC), ayon sa Metropolitan Manila Development Authority (MMDA).
Ayon sa MMDA nitong Huwebes, umabot sa 103.6 cubic meters o katumbas ng 36.585 tonelada ng basura ang nakolekta sa lugar.
Patuloy naman ang operasyon ng Metro Parkways Clearing Group ng MMDA upang mapanatili ang kalinisan, kaayusan, at kaligtasan sa lugar. Kabilang dito ang pag-aayos ng mga concrete barrier, paglilinis ng mga naiwang debris, at paghakot ng natitirang basura.
Matapos ang dalawang araw na rally sa White Plains Avenue, inilipat sa Liwasang Bonifacio sa Maynila ang ikatlong araw ng pagtitipon nitong Huwebes matapos bawiin ng lokal na pamahalaan ang permit na ibinigay sa INC.