PATAY ang isang American national nang mahulog mula sa ika-walong palapag ng isang condominium sa Valenzuela City.
Dead on the spot ang biktimang si alyas “Robert” 59, American national sanhi ng matinding pinsala sa ulo at katawan matapos bumagsak sa lobby ng naturang condo.
Sa ulat kay Valenzuela police chief PCol. Nixon Cayaban, lumalabas sa imbestigasyon ng Valenzuela City Police, naganap ang insidente Lunes ng 9:40 ng umaga sa Tower A Condominium, Isabelle de Valenzuela, Brgy. Marulas.
Batay sa pahayag sa pulisya ng 52-anyos na lady guard ng condominium na si alyas “Anita”, residente ng University Avenue, Brgy. Potrero, Malabon City, ginagampanan niya ang kanyang tungkulin nang laking gulat niya nang bumagsak sa tabi niya ang katawan ng biktima.
Kaagad naman niyang ipinaalam sa mga tauhan ng Valenzuela Police Sub-Station 3 ang insidente.
Isasailalim pa sa autopsy examination ang bangkay ng dayuhan upang matiyak ang sanhi ng kanyang kamatayan habang patuloy pa rin ang kanilang ginagawang pagsisiyasat para mabatid kung sadyang tumalon ang dayuhan o aksidenteng nahulog mula sa tinutuluyan niyang unit.(Beth Samson)