28 na nasawi sa gumuhong gusali sa Angeles City

Kinumpirma ng Bureau of Fire Protection (BFP) Central Luzon na umabot na sa 28 ang bilang ng mga nasawi sa pagguho ng isang gusaling itinatayo sa Angeles City, Pampanga.
Ayon sa pinakahuling ulat, isa pang indibidwal ang matagumpay na naiahon mula sa mga guho 9:56 ng gabi noong Sabado sa patuloy na search, rescue, at retrieval operations.
Noong Miyerkules, sinabi ng mga responder na nasa 30 porsiyento na ng mga debris sa lugar ang nalinis. Patuloy pa rin ang operasyon gamit ang mga tauhan at mabibigat na kagamitan sa kabila ng paminsan-minsang pag-ulan.
Gumuho ang siyam na palapag na gusaling nasa ilalim ng konstruksyon bago magbukang-liwayway noong Mayo 24.
Nauna nang sinabi ng Department of Labor and Employment (DOLE) na may posibleng paglabag sa occupational safety and health standards sa construction site. Naglabas din noon ang DOLE Region 3 ng work stoppage order laban sa proyekto dahil sa mga kakulangan sa kaligtasan.
Samantala, humarap sa isang press conference ang mga abogado ng may-ari at kontratista ng gusali isang linggo matapos ang insidente. Ayon sa isa sa kanila, handang tumulong ang may-ari sa mga biktima at humihiling ito ng isang independiyenteng imbestigasyon upang matukoy ang sanhi ng pagguho.